【渣馬Sub-3千金先生】 吳金帶：跑步令意志漸趨強大

人稱『金大師』的Odlo HK Runner吳金帶-連年Sub3的香港渣馬『千金先生』。從事地盤勘探工作的他，多年前剛開始跑步運動，在公園慢跑一小時，隔日落樓梯都有困難，後來利用放工後的夜晚時間參加跑會，每週固定四課的恆常訓練，成為連續多年3小時內完成渣馬的千金先生。對金大師來說，從身體訓練提升到心靈層次的自我突破，跑步已然成為生活中的一部分。

透過今次專訪金大師，帶大家了解他是如何投入跑步這項運動，以及跑步對他的意義，也許與你我有共同之處，或者能對我們有所啟發。

圖示：Odlo HK Runner 金大師-吳金帶 （相片由受訪者提供）

最初是如何接觸到跑步這項運動？
我記得好似係喺2001年，某一個放工嘅晚上，喺條好寧靜嘅街道上，聽到收音機嘅DJ喺度宣傳緊渣打馬拉松，要完成一個馬拉松係幾咁艱辛，唔係咁多人做得到。之後我就想報名，但已經過咗報名日期，惟有等出年。2002年我開始嘗試喺公園度慢跑一小時，好記得跑完冇乜事，第日落樓梯都要扶住落，之後隔多兩三日又再跑一小時，記得嗰下冇規律嘅練習，一星期可能跑兩至三課，如是者直至到2002年渣打馬拉松出賽。

說說你人生中的第一場馬拉松賽事？

2002年渣打馬拉松出賽當日，神咁早已經到尖沙咀，因為係我第一場正式報名嘅比賽，所以有啲緊張。我記得當時聽到好多跑友講，邊個邊個跑得幾快幾快，如果跟到你3個鐘頭40分返到嚟就好啦。因我冇比賽經驗，跟住一大堆人上線，鳴槍一響就拼命向前衝，衝到20公里我嘅體能已耗盡，當時我要行下跑下停下，跟住身邊有好多好慢好慢嘅人都慢慢離我而去，睇到佢哋跑得好慢但我已冇能力跟上嗰一刻，心有不甘，咬實牙根，響餘下嘅路程出現好多情緒，最終都畀我嘅堅持打敗直到終點。完成賽事一刻我身體慢慢放鬆下來，終於 嘗到完賽甜美嘅果實，慢慢咁回味，心內細說出年再嚟過。（當年成績係3小時38分）。

圖示：金大師（左）參加2019年香港渣打馬拉松 （相片由受訪者提供）

您是如何開始參加規律的跑步訓練？

喺2002年至2003年嘅訓練已經開始規律，個身體嘅狀況亦好咗，可以增加個週期性訓練，到03年渣打馬拉松出賽，我同自己講：『今年唔可以行，一定要持續咁跑返去』，所以亦都冇搏命咁衝出去，但到最終返到終點嘅時候，比起上年，只不過係快咗2分鐘 （成績3小時36分），我喺度諗到底係咩問題呢？自己一個人找唔到答案，所以我決定參加跑會，喺跑會度，多數係集體活動，做好多日常你一個人係唔會做嘅嘢， 比喻係對跑步基本嘅認識、對體能嘅認知、訓練週期性，所以好多時候都可以無意間突破到自己。跟住跑會之後嘅渣打馬拉松，我已可以跑到2小時57分，再過多一兩年已可以入到港隊代表香港出賽海外馬拉松賽事。

圖示：參加馬拉松賽事，追求自我突破（相片由受訪者提供）

一週當中，你是如何規劃自己的工作與訓練？
一般嚟講工作優先！好彩我嘅工作多數係固定時間收工，所以喺唔係太攰嘅情況底下，我盡量都會安排喺7點至到9點鐘呢段時間做恆常訓練，冇比賽一星期四課，到賽季會增加至五課至六課。

遇到比賽或生活的低潮，你是如何面對？
凡係人都一定有低潮，低潮嚟到嘅時候，我會在生活上調整，例如睇下戲、食好嘢、買自己想買嘅嘢。有啲人會覺得跑步訓練好辛苦、嘥時間。但我對我來講，跑步係可以釋放日常生活嘅負能量。跑到咁上下出一身汗，會令我有活著嘅感覺，心情自然會好啲。

圖示： Odlo HK Runner （左至右）Wade、金大師、Ｍickey於沙田城門河訓練（相片由受訪者提供）

跑步對你的意義？

“跑步令我有心靈上的變化，訓練不斷咁強弱交替，令意志漸趨強大，身體痛苦忍耐力增強，同時可以從中領悟生活上其他嘢。“ by Odlo HK Runner 吳金帶

推薦商品：
Active Spine運動機能底層短袖圓領上衣 (195352-15000)
ZEROWEIGHT CERAMICOOL LIGH 2-in-1 -男運動短褲 (321892-15001)

為推廣跑步運動，未來Odlo將於沙田城門河畔舉辦由Odlo HK Runner帶領的Riverside Base Run與5K個人計時賽活動，更多詳情將於Facebook：Odlo Hong Kong發佈。

世界級運動機能衣著Odlo   2019年6月專訪